ព្រះ​បរម​សព​ព្រះ​មហា​វីរក្សត្រ​ព្រះបាទ​នរោត្តម សីហនុ តម្កល់​ក្នុង​ព្រះ​បរម​រាជ​វាំង៣ខែ និង​សារាចរ​លុប​ចោល​កម្ម​វិធី​ផ្សេងៗ

រាជធានីភ្នំពេញ ៖  ដើម្បីចូលរួមកាន់មហាមរណទុក្ខអតីត ព្រះមហាក្សត្រខ្មែរព្រះករុណាព្រះបាទ សម្តេចព្រះនរោត្តមសីហនុ រាជរដ្ឋាភិបាលកម្ពុជាបានសម្រេចលុប ចោលកម្មវិធីមួយចំនួនរួមមាន៖
-សម្តេចនាយករដ្ឋមន្រ្តី ហ៊ុន សែន បានលុបចោលកម្មវិធីទៅចូលរួមកិច្ចប្រជុំកំពូលលើកទី៧ ស្តីពីការអភិវឌ្ឍន៏តំបន់ត្រីកោណ នៅទីក្រុងហូជីមិញ សាធារណរដ្ឋសង្គមនិយមវៀតណាម ពីថ្ងៃទី១៩ ដល់ថ្ងៃទី២០ តុលា ២០១២
- រាជរដ្ឋាភិបាលកម្ពុជាសម្រេច ផ្អាកព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ដែលតាមគម្រោងនឹងប្រារព្ធធ្វើពីថ្ងៃទី២៧ ដល់ថ្ងៃទី២៩ វិច្ឆិកា ២០១២ ។ ប៉ុន្តែនៅតាមបណ្តាខេត្តនានាអាច រៀបចំតាមធម្មតាទៅតាមប្រពៃណី និងលទ្ធភាពរបស់ប្រជាពលរដ្ឋ។ យោងតាមសារាចរលេខ០១ របស់រាជរដ្ឋាភិបាលកម្ពុជា ចុះថ្ងៃទី១៦ តុលា ២០១២ ក៏បានបញ្ជាក់ដែរថា ការឈប់សម្រាក៣ថ្ងៃ របស់មន្រ្តីរាជការ និយោជិត កម្មករ ក្នុងអំឡុងព្រះរាជពិធីបុណ្យអុំទូកនេះ នៅរក្សាដដែល ។

ដោយឡែកសម្រាប់គណបក្សប្រឆាំង និងសង្គមស៊ីវិលមួយចំនួនដែល មានគម្រោងធ្វើបាតុកម្មអហិង្សា នៅថ្ងៃទី២៣ តុលា ២០១២នេះ ក៏ត្រូវបានមន្រ្តីគណបក្សប្រឆាំងអះអាងថា លុបចោលផងដែរ។ដើម្បីចូលរួមកាន់មហាមរណទុក្ខអតីតព្រះមហាក្សត្រខ្មែរ ព្រះករុណា ព្រះបាទ សម្តេចព្រះនរោត្តមសីហនុនេះផងដែរ រាជរដ្ឋាភិបាលកម្ពុជាក៏បានចេញ សារាចរណែនំាដូចខាងក្រោម ៖
ប្រកាសថ្ងៃកាន់ទុក្ខគោរព ព្រះវិញ្ញាក្ខន្ឋជាផ្លូវការរយៈពេល៧ថ្ងៃ ចាប់ពីថ្ងៃទី១៧ តុលា ដល់ថ្ងៃទី២៣ តុលា ២០១២ ។

ក្នុងរយៈពេលកាន់ទុក្ខនេះ គ្រប់ស្ថាប័ន ឯកជន និងប្រជាពលរដ្ឋនៅទូទំាងប្រទេស ត្រូវបង្ហូតទង់ជាតិត្រឹម ១ភាគ៣ នៃទង់ជាតិចាប់ពីលើ ។ គ្រប់ស្ថានីយ៍វិទ្យុ និងទូរទស្សន៍ជាតិ និងឯកជន ព្រមទាំងកន្លែងកំសាន្តសប្បាយ ត្រូវផ្អាកការផ្សាយនូវទស្សនីយភាព ការសម្តែង និងការប្រគុំតន្រ្តីផ្សេងៗ ដែលមានលក្ខណៈសប្បាយគគ្រឹកគគ្រេង ។ ប្រជាពលរដ្ឋគ្រប់រូប ពាក់សញ្ញាកាន់មរណទុក្ខ និងតុបតែងសញ្ញាកាន់មរណទុក្ខនៅលើព្រះឆាយាលក្ខណ៍ ។ សារាចររបស់រាជរដ្ឋាភិបាលកម្ពុជាក៏បានបញ្ជាក់បន្ថែមទៀតថា ខាងលើនេះ គឺជាការកាន់មហាមរណទុក្ខលើកទី១ ។  ព្រះបរមសពព្រះមហាវីរក្សត្រ នឹងត្រូវតម្កល់រយៈពេលមិនតិចជាង៣ខែ នៅក្នុងព្រះបរមរាជវំាង និងក្នុងរយៈពេល៣ខែនេះ មន្រ្តីរាជការ ប្រជាពលរដ្ឋ និងមិត្តភក្តិបរទេសទំាងអស់អាចចូលមកគោរពវិញ្ញាក្ខន្ធបាន  ៕

បញ្ចូលអត្ថបទ ៖ ស្រីណា កោះ

ផ្តល់សិទ្ធដោយ កោះសន្តិភាព